Jede jedi weiss
(T: & M: R. Zoss, 2003)
Song hörenVideo schauen
 
 
Jede jedi weiss: wo wird gjasset wird gloge
jede treit e Glücksstei a sym Ring
Jede jedi weiss, mer sy guet erzoge
sogar no der Souhoung in üs inn
Jede jedi weiss, bschisse wirsch ging glych
Arm blybt Arm, u Rych blybt Rych
ei Tüfelskreis – jede jedi weiss
 
Jede jedi weiss, das Schiff sinkt gly
wo mer druffe reise, kene weiss wohi
Jede jedi het so nes Gfüehl im Buuch
als chiemi o der Käpt’n nümm so druus
Jede treit sy Seel im Portmonee, u holt sech d Wält hei am Fernseh:
Bluet, Träne, Schweiss – jede jedi weiss

Jede jedi weiss, vom Ching zum Greis
’ s dräijt sech alls im Kreis – jede jedi weiss

Jede jedi weiss, es isch jitz oder nie
Jede jedi weiss, ’s trifft di oder mi
Jede wetti cool sy u jung für ging
e jede wett e Star sy mit Guld ir Stimm
Jede jedi weiss ds Gschäft isch versiechet
jede Büetzer chrüpplet u chyychet:
Ei Stress, ei Steiss – jede jedi weiss
 
Jede jedi weiss es d Zyt isch da
jede jedi gspürt es brönnt unghüür
Alles wo mer hei als Frou u Maa
isch nume ja der Rouch vom ne ewige Füür
Jede jedi weiss, ’s chunnt alls mal uus
drum stoss jitz aa, i giben eis uus!
’ s gyt eh nüüt Nöijs – jede jedi weiss
 
Jede jedi weiss, vom Ching zum Greis
’ s dräijt sech alls im Kreis – jede jedi weiss
 
Jede jedi weiss, dass voll im Seich bisch
Jede jedi weiss, was hesch düremache müesse
Vo de Türm vo Neu-York zur Gotthardtunnelhöll
chasch’s a jeder Chrützig bluetig büesse
Jede jedi weiss ’s geit nümme lang
drum nimm dys Härz jitzt emal i d Hand
am Änd vor Reis – wo jede jedi weiss