Härzland (Schwyzer-Himne)
(2002, T & M: R. Zoss)

Ausschnitt anhören • ganzes Lied und herunterladen
Notenblatt herunterladen
 
 
Es Land wo Milch u Honig fliesst
wo niemer Hunger het
wo men enang no fründlech grüesst
u drei, vier Sprache redt
 
Es Land wo lang ke Chrieg het gkennt
e Stadt wo früech ufsteit
es Dorf wo no jede jede gkennt
e Gloube wo di treit
 
Das isch mys Land, sy myni Lüt
das isch die Sprach won i verstah
Das isch mys Land, sy myni Lüt
e chlyni Wält wo wott vergah
 
E Wätterfee, der Samschtigs-Jass
e Techno-Fuehr ir Gass
es Gottlett vo ne re zfridne Sou
es wysses Chrütz im Pass
 
En Eiger, Mönch, es Jungfroujoch
e Harley-Davidson
es Chnübi Hasch, e Chäs mit Loch
und Änds Monet der Lohn
 
Das isch mys Land, sy myni Lüt
das isch die Sprach won i verstah
Das isch mys Land, sy myni Lüt
e chlyni Wält wo wott vergah
 
En Uhr am Arm wo nie blybt stah
es silbrigs Trottinett
e Schatz wo de nid für Gäld chasch ha
e Fernseh vor em Bett
 
E Bundesrat ohni Bodyguard
es Wasser wo chasch trinke
der Summer schmöckt nach Servala
Ching wo de Züg tüe winke
 
Mängisch wen i der Läckmer ha
und i d Wält nümme verstah
nümme weiss wo häre ga
de chunnt es mi plötzlech aa…
 
Das isch mys Land, sy myni Lüt
das isch die Sprach won i verstah
Das isch mys Land, sy myni Lüt
e chlyni Wält wo wott vergah
 
Es Fränkli wo di bücksch derna
e Hund wo folget brav
es Velo wo de no chasch la stah
zmitts a der Bahnhofstrass
 
E Stange Bier, es Birchermues
es Sturmgwehr ungrem Schaft
es Alperot wo brönnt ir Bruscht
der Herrgott wo ufpasst
 
Das isch mys Land, sy myni Lüt
das isch die Sprach won i verstah
Das isch mys Land, sy myni Lüt
e Zyt wo eim nümm los wott la…